Everton ចង់ប្រើប្រាស់កីឡដ្ឋាន Goodison Park សម្រាប់ជាទឹកដីក្រុមនារីរបស់ខ្លួន

Everton កំពុងសម្លឹងមើលឱកាសបន្តប្រើប្រាស់កីឡដ្ឋានចាស់ Goodison Park សម្រាប់ធ្វើជាទឹកដីថ្មីរបស់ក្រុមនារីរបស់ពួកគេ ក្រោយពេលក្រុមបុរសនឹងផ្លាស់ទៅកាន់ទឹកដី កីឡដ្ឋានថ្មី នៅរដូវកាលក្រោយ។ ក្រុមបាល់ទាត់បុរស Everton គ្រោងចាកចេញពីកីឡដ្ឋាន Goodison Park នៅចុងបញ្ចប់រដូវកាល ២០២៤-២៥ នេះ ដើម្បីផ្លាស់ទៅកីឡដ្ឋានថ្មីដែលទើបសាងសង់រួចមានឈ្មោះថា Bramley Moore Dock ។ កន្លងមក Everton ធ្លាប់បានបង្ហាញគម្រោងថា ទីតាំងកីឡដ្ឋានចាស់អាចនឹងត្រូវកម្ទេចចោល ហើយសាងសង់ជាតំបន់ផ្ទះស្នាក់នៅវិញ។ យ៉ាងណាមិញ ក្លិបរហស្សនាមស្ករគ្រាប់ ហាក់មានបំណងចង់រក្សាកីឡដ្ឋាន Goodison Park អោយនៅបន្តឈរជើងដដែល ដោយផ្លាស់់អោយក្រុមនារី Everton យកធ្វើជាទឹកដីវិញ។ បច្ចុប្បន្ន ក្រុមនារី Everton ប្រើប្រាស់កីឡដ្ឋាន Walton Hall Park ប៉ុន្តែទីតាំងនេះ មានភាពតូចចញ្អៀត មិនអាចផ្ទុកអ្នកគាំទ្របានច្រើន និងមិនស្របតាមគោលការណ៍របស់ការប្រកួតលីគបាល់ទាត់នារីអង់គ្លេស Women’s Super League៕