🚨 Bournemouth អាចនឹងព្រមលក់ Antoine Semenyo ចន្លោះតម្លៃពី 30 ទៅ 34 លានផោន នៅរដូវក្តៅនេះខាងមុខនេះ ស្របពេលដែលលោក Jason Wilcox ក៏ជាអ្នកគាំទ្រដ៏ធំរបស់ Semenyo ផងដែរ👀⏳ រឿងរ៉ាវបន្ថែមលើការផ្ទេរមួយនេះនៅវែងឆ្ងាយទៀត ព្រោះថាបិសាចក្រហមក៏នៅមានជម្រើសផ្សេងៗទៀតផងដែរ🧐 ខ្លាចតែថាលក់ប៉ុណ្ណឹង ដល់ដឹងថាបិសាចក្រហមចង់បានតម្លើងមក 50 ទៅ 60 លានផោនវិញទៅ😬

ចាប់តាំងចេញពី Man Utd មក! គិតត្រឹមពេលនេះ Anthony Elanga ស៊ុត និង assists បាន២៧ដងហើយ ខណៈដែលរូបគេមានបំណងជួយឲ្យ Nottingham Forest ទៅលេង Champions League នៅរដូវកាលក្រោយ👌

ក្បាលម៉ាស៊ីនធំ ២ រូបផ្នែកវេជ្ជសាស្ត្ររបស់ United ចុះចេញពីតំណែងទន្ទឹមគ្នានៅសប្ដាហ៍នេះ តាមការបញ្ចាក់ជាឯកសារផ្លូវការលើកចុងក្រោយរបស់ក្រុមបិសាចក្រហម Manchester United បានឲ្យដឹងថាលោក Gary O'Driscoll ដែលប្រធានផ្នែកវេជ្ជសាស្ត្រកីឡា និងលោក Jim Moxon ដែលជាប្រធានគ្រូពេទ្យចលនារបស់ក្រុមធំនឹងចាកចេញពីក្លិបជាផ្លូវការហើយនៅពាក់កណ្ដាលរដូវកាល ២០២៤/២០២៥ នេះ ។

ជំនួបក្របខណ្ឌ Premier League រវាងក្រុម Chelsea និងក្រុម Southampton ដែលធ្វើឡើងនាកីឡដ្ឋាន Stamford Bridge កាលពីយប់មិញ បានបញ្ចប់ទៅដោយក្រុម Chelsea បានយកឈ្នះក្រុម Southampton ដោយលទ្ធផល ៤-០។ ស្ថិតិនៃការប្រកួតគឺ ក្រុមម្ចាស់ផ្ទះ Chelsea បានគ្រប់គ្រងបាល់ដល់ទៅ ៦០ភាគរយ មានឱកាសស៊ុត ១៩ដង ខណៈក្រុមភ្ញៀវ Southampton មានឱកាសស៊ុតតែ៧ដង។ នៅក្នុងវគ្គទី១ នេះដែរ ក្រុម Chelsea បានរកគ្រាប់នាំមុខដល់ទៅ៣គ្រាប់ ដែលគ្រាប់ទី១ធ្វើបានដោយ Christopher Nkunku នៅនាទី២៤ មុនពេល Pedro Neto ធ្វើបានគ្រាប់ទី២នៅនាទី៣៦ ហើយ Levi Colwill រកបានគ្រាប់ទី៣នៅនាទី៤៤។ នៅក្នុងវគ្គទី២ Chelsea នៅតែមានប្រៀបលើគូប្រកួតរបស់ខ្លួនដដែល ហើយនាទី៧៨ Marc Cucurella ក៏បានរកគ្រាប់ទី៤ ដែលជាគ្រាប់បាល់ចុងក្រោយនៃការប្រកួតនេះ។ ជាមួយជ័យជំនះនេះ បានធ្វើអោយ Chelsea វិលទៅកាន់ ចំណាត់ថ្នាក់លេខ៤ នៃតារាងពិន្ទុក្របខណ្ឌ Premier League វិញ ដែលបានបង្កជាក្តីរីករាយយ៉ាងខ្លាំង ដល់គ្រូបង្វឹកលោក Enzo Maresca។ លោក Enzo Maresca បានអះអាងថា កូនក្រុមខ្លួនធ្វើបានយ៉ាងល្អ និង ឈ្នះការប្រកួតដ៏សំខាន់។ ថ្លែងអោយដឹងក្រោយចប់ការប្រកួត គ្រូបង្វឹកវ័យ៤៥ឆ្នាំបានអោយដឹងដូច្នេះ “ ខ្ញុំរីករាយណាស់។ យើងបាននិយាយរួចហើយថាចាប់ពីពេលនេះតទៅរាល់ការប្រកួតគឺសំខាន់។ ហើយប្រសិនបើយើងបាន៣ពិន្ទុវាកាន់តែល្អ។ តែការប្រកួតនេះយើងក៏ធ្វើការងារដ៏ពិសេសគឺឈ្នះ៣ពិន្ទុ។ យើងបានខកចិត្តប៉ុន្មានដងមកហើយ ប៉ុន្តែការឈ្នះលើកនេះ ធ្វើអោយយើងមានកម្លាំងចិត្តឡើងវិញហើយពួកយើងនឹងកាន់តែព្យាយាមគ្រប់ការប្រកួតដែលនៅសល់ទៀត។” Chelsea បច្ចុប្បន្នមាន ៤៦ពិន្ទុ ក្រោយឆ្លងកាត់ ២៦ប្រកួត ឡើងឈរលេខ៤ ពីលើក្រុមលេខ៥ Man City ២ពិន្ទុ តែ Man City លេងយឺតជាង១ប្រកួត។ រីឯ Southampton នៅបាតតារាងដដែលមាន៩ពិន្ទុ ឃ្លាតពីតំបន់សុវត្ថិភាព ១៣ពិន្ទុ៕

លោក Xavi អតីតគ្រូបង្វឹក Barcelona ត្រូវបានផ្សារភ្ជាប់ទៅនឹងការទៅជំនួសតំណែងគ្រូបង្វឹកលោក Ruben Amorim នៅ Man UTD។ នេះបើតាមការផ្សព្វផ្សាយពីសារពត៌មាន Caught Offside។ ដំណឹងបានលេចឮឡើងក្រោយមានការរាយការណ៍អោយដឹងថា Man UTD ចាប់ផ្តើមអស់ភាពអត់ធ្មត់ និងបានបង្វែរចំណាប់អារម្មណ៍ចង់បានគ្រូបង្វឹកថ្មី មកជំនួសតំណែងលោក Ruben Amorim បន្ទាប់ពីមិនសូវទទួលបានលទ្ធផលល្អ ស្របពេលក្រុមបានធ្លាក់ទៅលេខ ១៥ ក្នុងតារាងលីគកំពូលអង់គ្លេស។ ចាប់តាំងពីចូលកាន់តំណែងនៅខែវិច្ឆិកា ឆ្នាំ២០២៤ លោក Amorim បានជួយក្រុមយកឈ្នះការប្រកួតធំៗដូចជាឈ្នះលើក្រុម Man City ក្នុងក្របខណ្ឌ Premier League ឈ្នះក្រុម Arsenal នៅ FA Cup ជុំទី៣ ប៉ុន្តែពួកគេបែរជាចាញ់ក្រុមមានកម្រិតក្រោមខ្លួនជារឿយៗ និងជាពិសេសការចាញ់នៅទឹកដី Old Trafford ដែលនាំអោយកើតមានចម្ងល់ទៅលើប្រព័ន្ធលេងរបស់ក្រុម។ ពេលមកដល់ក្លិបដំបូង បុរសវ័យ៤០ឆ្នាំបានអះអាងថា នឹងប្រើប្រាស់ប្រព័ន្ធលេងដែលទទួលជោគជ័យនៅ Sporting និងចង់ជួយក្រុមគេចចេញពីបញ្ហាធ្លាក់ទម្រង់លេងអោយបាន។ ប៉ុន្តែក្រោយរងបរាជ័យជាបន្តបន្ទាប់ បុរសជនជាតិព័រទុយហ្កាល់ ក៏បានរងការរិះគន់ជាខ្លាំង។ ទន្ទឹមនឹងនេះកីឡាករក្រុម Man UTD មួយចំនួនមិនបញ្ជាក់ឈ្មោះ បានជួបបញ្ហាទៅនឹងប្រព័ន្ធលេងរបស់លោក Amorim។ បែបនេះហើយបានធ្វើអោយក្រុមប្រឹក្សារបស់ក្លិបបិសាចក្រហមកំពុងពិចារណាថា តើលោក Ruben Amorim ជាជម្រើសត្រឹមត្រូវក្នុងការមកដោះស្រាយបញ្ហារបស់ក្រុមឬយ៉ាងណា។ ឥឡូវមានការរាយការណ៍ថា Man UTD មានបំណងផ្លាស់ប្តូរគ្រូបង្វឹកទៀតហើយ នៅដំណាច់រដូវកាលនេះ ដោយលោក Xavi អតីតគ្រូបង្វឹក Barcelona ត្រូវបានផ្សារភ្ជាប់ទៅកាន់កីឡដ្ឋាន Old Trafford ។ មែនទែនទៅ មានការបង្ហើបថា លោក Xavi ត្រូវបាន Man UTD ចង់នាំយកទៅតាំងពីបញ្ចប់តំណែងលោក Eric Ten Hag មកម្ល៉េះ ប៉ុន្តែ បុរសវ័យ៤៥ឆ្នាំ បានបដិសេធដោយលើកហេតុផលថា មិនចង់ដឹកនាំក្រុមនៅពាក់កណ្តាលរដូវកាលទេ គឺចង់ចាប់ផ្តើមការងារក្រោយចប់រដូវកាល។ រីឯ Man UTD ចង់ ដោះស្រាយបញ្ហាដែលកំពុងកើតមានភ្លាមៗ ទើបសម្រេចនាំយកលោក Ruben Amorim មកកាន់តំណែង។ ទោះយ៉ាងណា របាយការណ៍ដែលបានចុះផ្សាយ ហាក់បីជាផ្ទុយទៅនឹងព័ត៌មានកន្លងមកដែលថា ក្លិបនៅតែទុកចិត្តទៅលើលោក Ruben Amorim បើទោះបីជាក្រុមបានធ្លាក់ទម្រង់លេងខ្លាំងក៏ដោយ៕

លោក Oliver Glasner គ្រូបង្វឹកក្រុម Crystal Palace បានលើកសរសើរមិនដាច់ពីមាត់ទៅលើកូនក្រុមរបស់ខ្លួន ក្រោយពីពួកគេបានយកឈ្នះក្រុម Aston Villa នៅក្នុងការប្រកួតក្របខណ្ឌ Premier League កាលពីយប់មិញ។ ការប្រកួតដែលធ្វើឡើងនាកីឡដ្ឋាន Selhurst Park កីឡាករ Ismaïla Sarr ជាអ្នករកគ្រាប់បើកឆាកនាំមុខអោយក្រុមម្ចាស់ផ្ទះ Crystal Palace នៅនាទី២៩។ រីឯក្រុមភ្ញៀវ Aston Villa មានឱកាសរកគ្រាប់បាល់បានដែរ ដោយ Morgan Rogers នៅនាទី៤២ តែត្រូវបាន VAR បដិសេធវិញ។ ដូច្នេះវគ្គទី១មានគ្រាប់បាល់កើតឡើងតែ១គ្រាប់ប៉ុណ្ណោះ។ យ៉ាងណា Aston Villa នៅតែអាចរកគ្រាប់បាល់បានដដែល នៅក្នុងការប្រកួតវគ្គទី២នាទី ៥២ ដែលធ្វើបានដោយ Morgan Rogers។ ក្រោយពីត្រូវបានគូប្រកួតតាមស្មើរួចនោះ ស្រាប់តែក្រុម Crystal Palace ហាក់ក្តោបក្តាប់ស្ថានការណ៍បានល្អ និងធ្វើការវាយសម្រុករហូតរកបាន៣គ្រាប់ផ្ទួនៗបន្ថែមទៀត ដោយ Jean-Philippe Mateta នៅនាទី ៥៩ Ismaila Sarr នៅនាទី៧១ និង Eddie Nketiah នៅនាទី៩០+១ ដើម្បីបញ្ចប់ការប្រកួតដោយលទ្ធផល Crystal Palace ៤ Aston Villa ១។ ការធ្វើបានល្អរបស់កូនក្រុមបានធ្វើអោយគ្រូបង្វឹកក្រុម Crystal Palace លោក Oliver Glasner មានការពេញចិត្ត និងថា កីឡាករបានបង្ហាញពីអ្វីដែលលោកចង់បាននៅលើទីលាន។ គ្រូបង្វឹកជនជាតិអូទ្រីស បានអោយដឹងក្រោយចប់ការប្រកួតដូច្នេះ “ គ្រប់គ្នាមានភាពរីករាយណាស់ រួមទាំងរូបខ្ញុំផងដែរ។ យើងដឹងថា យើងអាចមានការប្រកួតដ៏ល្អ ហើយនេះជាអ្វីដែលកូនក្រុមរបស់ខ្ញុំបង្ហាញមកខ្ញុំថា ពួកគេអាចធ្វើវាបាន។ ខ្ញុំគិតថាយើងទាំងអស់គ្នាទទួលបានរង្វាន់ ហើយកីឡាករទទួលបានរង្វាន់សម្រាប់ការខិតខំប្រឹងប្រែងរបស់ពួកគេ ដែលរង្វាន់នោះគឺជាភាពជោគជ័យហ្នឹងហើយ។” សម្រាប់៣ពិន្ទុនេះ ធ្វើអោយ Crystal Palace នៅឈរលេខ១២ក្នុងតារាងពិន្ទុក្របខណ្ឌ Premier League មាន ៣៦ពិន្ទុ។ រីឯ Aston Villa នៅលេខ១០ មាន ៤២ពិន្ទុ៕

ក្លិប Newcastle United បានរកឃើញគោលដៅក្នុងការនាំយកកីឡាករមកថ្មីបើសិនជាខ្សែប្រយុទ្ធ Alexander Isak ត្រូវចាកចេញ ។ កន្លងទៅ Alexander Isak ត្រូវបានរាយការណ៍ថា អាចនឹងចាកចេញពី Newcastle United បើក្លិបមិនទទួលបានកៅអីទៅ UEFA Champions League នៅរដូវកាលក្រោយ។ កិច្ចព្រមព្រៀងផ្ទាល់មាត់រវាងកីឡាករស៊ុយអែត និងក្លិប Newcastle United បានធ្វើឡើង ដោយកីឡាករចង់បានឱកាសលេងនៅពានរង្វាន់កំពូលអឺរ៉ុប ដែលជាការដាក់សំពាធដ៏ពិបាកមួយសម្រាប់ក្លិបរហស្សនាមសារិការព្រៃ។ លក្ខខណ្ឌរបស់កីឡាករវ័យ២៥ឆ្នាំ កើតឡើងចំពេលដែលរូបគេត្រូវបានដឹងថាបានទទួលការចាប់អារម្មណ៍ពីក្លិបអេស្ប៉ាញ Barcelona ដែលជាក្លិបតែងតែមានកៅអីលេងពានរង្វាន់អឺរ៉ុប។ សម្រាប់ Barcelona ការចាប់អារម្មណ៍ទៅលើ Isak ដ្បិតក្លិបចង់ស្វែងរកកីឡាករវ័យក្មេង អាចជំនួសកន្លែងរបស់ខ្សែប្រយុទ្ធ Robert Lewandowski ដែលកាន់តែមានវ័យជ្រេទៅហើយ។ ទោះយ៉ាងណា របាយការណ៍ចុងក្រោយបានអោយដឹងថា Newcastle United បានសម្លឹងឃើញកីឡាករមួយរូបហើយ មកជំនួស Alexander Isak បើរូបគេត្រូវចាកចេញពិតមែននោះ នោះគឺខ្សែប្រយុទ្ធ Hugo Ekitike របស់ក្លិបអាល្លឺម៉ង់ Eintracht Frankfurt។ Hugo Ekitike ធ្លាប់ជាគោលដៅរបស់ Newcastle United តាំងពីរូបគេត្រៀមចាកចេញពីក្លិបបារាំង Reims ប៉ុន្តែបានសម្រេចជ្រើសរើសចូលរួមជាមួយ Paris Saint-Germain ទៅវិញ ក្នុងឆ្នាំ២០២៣ មុនបន្តទៅចូលរួម Eintracht Frankfurt នៅឆ្នាំ២០២៤។ យ៉ាងណា កីឡាករវ័យ២២ឆ្នាំ នៅតែស្ថិតនៅក្នុងគោលដៅរបស់ Newcastle United ដដែល ហើយចំណាប់អារម្មណ៍នេះកាន់តែកើនឡើង ក្រោយពី Alexander Isak បានដាក់លក្ខខណ្ឌជាមួយក្លិបរួចមកនោះ។ បែបនេះក្តី Newcastle United ក៏នឹងមិនអាចនាំយក Hugo Ekitike បានដោយងាយស្រួលដែរ ដ្បិត Eintracht Frankfurt បានដាក់តម្លៃកីឡាកររបស់ខ្លួនយ៉ាងខ្ពស់ ៨០លានអឺរ៉ូ ហើយរូបគេក៏កំពុងទទួលបានការចាប់អារម្មណ៍ ពីក្លិបធំៗមួយចំនួនដូចជា Manchester United, Arsenal, West Ham, Chelsea និង Liverpool ផងដែរ៕

គ្រូបង្វឹក Fenerbahçe លោក Jose Mourinho ត្រូវបានចោទប្រកាន់ពីការបញ្ចេញមតិមានលក្ខណៈរើសអើងជាតិសាសន៍នៅក្រោយការប្រកួតទល់នឹង Galatasaray។ ក្នុងជំនួបដែលបញ្ចប់ដោយលទ្ធផលស្មើគ្នា ០-០ រវាង Galatasaray និង Fenerbahçe នៃការប្រកួតលីគកំពូលរបស់ទួរគីកាលពីពេលថ្មីៗនេះ លោក Jose Mourinho គ្រូបង្វឹកក្រុមភ្ញៀវ Fenerbahçe ត្រូវបានគេរាយការណ៍ថា បានបំពានច្បាប់រើសអើងពូជសាសន៍។ វាមិនទាន់ច្បាស់ថា តើ Galatasaray នឹងចោទប្រកាន់ លោក Jose Mourinho ក្នុងការបញ្ចេញមតិមួយណាទេ ប៉ុន្តែពួកគេប្រហែលជាសំដៅទៅលើ សំដីដែលលោកនិយាយថា កីឡាករបម្រុងរបស់ Galatasaray ហក់លោតដូចជាស្វា។ ក្រុមម្ចាស់ផ្ទះ Galatasaray នឹងរៀបចំសំណុំរឿងនេះបញ្ជូនទៅកាន់ UEFA និងសហព័ន្ធបាល់ទាត់របស់ ទួរគី ដើម្បីដោះស្រាយបន្តស្ដីពីការរើសអើងពូជសាសន៍របស់បុរសជនជាតិព័រទុយហ្កាល់វ័យ ៦២ឆ្នាំ។ ក្នុងច្បាប់បាល់ទាត់គេបានចែងយ៉ាងច្បាស់ស្ដីពីការហាមមិនអោយប្រមាថ ឬមើលងាយដល់ជាតិសាសន៍ដទៃ ដែលត្រូវបានគេរាប់បញ្ចូលថា ជាការរើសអើងពូជសាសន៍។ នេះមិនមែនជាលើកទី១ទេ ដែល លោក Jose Mourinho អតីតគ្រូបង្វឹក Chelsea, Manchester United និង Tottenham Hotspur ត្រូវបានចោទប្រកាន់បែបនេះ ដោយកន្លងមកលោកក៏ធ្លាប់ត្រូវបានពិន័យ និងព្យួរសម្រាប់ការអត្ថាធិប្បាយរិះគន់របស់លោកអំពីមន្ត្រីរៀបចំការប្រកួតរបស់ទួរគីផងដែរ៕

គ្រូបង្វឹក Arsenal លោក Mikel Arteta បាននិយាយថា លោកមានការខឹងសម្បារចំពោះការលេងរបស់កូនក្រុម ក្រោយពីប្រកួតចាញ់ក្រុម West Ham United កាលពីចុងសប្តាហ៍កន្លងទៅ។ ជាការពិត ក្រុម Arsenal បានរងបរាជ័យក្រោមថ្វីជើងក្រុម West Ham United ១-០ នៅក្នុងជំនួបក្របខណ្ឌ Premier League ដែលធ្វើឡើងនាទឹកដីខ្លួនឯង កីឡដ្ឋាន Emirates Stadium។ ការប្រកួតនោះ ក្រុមម្ចាស់ផ្ទះ Arsenal គ្របសង្កត់ទៅលើគូប្រជែងរបស់ខ្លួនយ៉ាងខ្លាំងដែរ ដោយអាចគ្រប់គ្រងបាល់ដល់ទៅ ៦៨ ភាគរយ ឱកាសស៊ុត ដល់ទៅ ២០ដង ខណៈក្រុមភ្ញៀវ West Ham មានឱកាសស៊ុតបាល់ត្រឹមតែ៥ដង។ យ៉ាងណា ក្រុម West Ham United បែរជាមានសំណាងរកបានគ្រាប់បាល់នាំមុខមុន នៅចុងវគ្គទី១ ដោយការតែតបញ្ចូលទីរបស់ Jarrod Bowen។ ចូលមកដល់វគ្គទី២ Arsenal នៅតែបន្តគាបសង្កត់ និង ព្យាយាមវាយសម្រុកស្វែងរកគ្រាប់បាល់មកវិញតែក្រៅពីមិនបានជោគជ័យហើយ ពួកគេនៅត្រូវសល់គ្នាតែ១០នាក់លើទីលានទៀត ក្រោយពីកីឡាករ Myles Lewis-Skelly ត្រូវពិន័យកាតក្រហមនៅនាទី៧៣។ លទ្ធផល Arsenal ០ West Ham United ១ ក៏បន្តដល់ចប់ការប្រកួត។ បរាជ័យលើទឹកដីខ្លួនឯង ទាំងដែលមានប្រៀបក្នុងការប្រកួតបានធ្វើអោយ គ្រូបង្វឹក Arsenal លោក Mikel Arteta មានការខឹងសម្បារយ៉ាងខ្លាំង ចំពោះកូនក្រុម ហើយវាធ្វើអោយក្តីសង្ឃឹមក្នុងការប្រជែងជើងឯកពានរង្វាន់ Premier League កាន់តែឃ្លាតឆ្ងាយ។ ទាក់ទិននឹងរឿងនេះ លោក Mikel Arteta បានអោយដឹងថា “ខ្ញុំពិតជាខឹង និងទើសចិត្តខ្លាំងណាស់ចំពោះអ្វីដែលមាននៅក្នុងដៃរបស់យើងដែលវាជាការអនុវត្តនិងលទ្ធផល។ យើង គ្មានកន្លែងណាដែលនៅជិតកម្រិតដើម្បីមានឱកាសឈ្នះ Premier League សោះ។ ខ្ញុំទទួលខុសត្រូវចំពោះរឿងនេះ ដូច្នេះខ្ញុំខឹងខ្លាំងណាស់។ យើងខ្វះប្រសិទ្ធភាព ហើយការប្រកួតនេះយើងមិនល្អគ្រប់គ្រាន់ទេ។ វាជាការវាយប្រហារដ៏ធំមួយសម្រាប់យើង។” Arsenal នៅលេខ២ក្នុងតារាងពិន្ទុ ដដែលដោយមាន៥៣ពិន្ទុ តែបង្កើនគម្លាតពិន្ទុពីក្រុមកំពូលតារាង Liverpool ដល់ទៅ១១ពិន្ទុ។ រីឯ West Ham នៅលេខ១៦ មាន ៣០ពិន្ទុ៕

ខ្សែការពារ John Stones របស់ Man City អាចនឹងបន្តស្ថិតនៅក្រៅទីលានរយៈពេលយូរព្រោះតែរបួសភ្លៅ ហើយអាចត្រូវការការវះកាត់ព្យាបាល។ នេះបើតាមការផ្សព្វផ្សាយពីសារពត៌មាន BBC។ កីឡាករអង់គ្លេស ត្រូវផ្លាស់ប្តូរចេញក្រោយលេងបានត្រឹមតែ ៨នាទី ក្នុងការប្រកួតដែល Man City ចាញ់ Real Madrid ជាលើកទី២ ក្នុងជើងទី២វគ្គ Playoff ពានរង្វាន់ UEFA Champions League កាលពីពេលកន្លងទៅ។ របួសរបស់ John Stones អាចចាត់ទុកជារបួសធ្ងន់ធ្ងរមួយ ដែលត្រូវការចំណាយរយៈពេលច្រើនសប្តាហ៍ដើម្បីជាសះស្បើយ។ បញ្ហាកើតឡើងទៅលើកីឡាករវ័យ៣០ឆ្នាំ គឺមួយសប្តាហ៍បន្ទាប់ពីវាត្រូវបានគេបញ្ជាក់ថា មិត្តរួមក្រុមរបស់គេ ខ្សែការពារ Manuel Akanji នឹងត្រូវការការវះកាត់របួសភ្លៅដូចគ្នា ហើយត្រូវអវត្តមានរហូតដល់ ១០ សប្តាហ៍។ John Stones បានលេងការប្រកួត Premier League ចំនួន១១លើក ក្នុងរដូវកាលនេះ ហើយរូបគេក៏ទើបតែបានវិលត្រលប់មកវិញបន្ទាប់ពីការអវត្តមានរយៈពេលមួយខែកាលពីចុងខែមករាដោយសារតែរបួសជើង៕